30-03-2010 - Moi Noordenveld: Lammert Keizer

Nou moest toch es heuren Geertie, zee Hinderk, toen ‘e van het waark thoes kwam. Mien baos wil mai nor een piscursus hebben”. Geertie schrok der van: Nor een piscursus, je hebben toch gien last van de prostaat mien jong?” ”Nee man”, stelde Hinderk heur gerust. Het is Pis met een Z. Dat staait veur Pensioen in Zicht. En snap ie dat nou? Hou kuj ’t bedenken, sturen ze je op cursus Niks doun!”

Eem laoter an taofel hadden ze het er nog es over. Aal die jaoren hebben ze mai zegd wat ik doun mus. Nou krieg ik het zölf veur het zeggen en dat laot ik mai neit aofnimmen. Ja mor jong, straks bej de heule dag bai hoes en zoveul hobbies hej ok neit, probeerde Geertie nog. Mor Hinderk bleef der bai dat hij gien huilp neudig haar om de tied te vullen.
Toen Hinderk op zien 65ste stopte met waarken, haar ‘e krap an vieftig jaor nor de febriek west. De eerste paor week bai hoes gung het allemaol best. Wat laoter van berre, saomen een plakkie stoet en zo nou en dan muik e der zölfs een glassie sinaasappelsap bai. Kraant lezen, koppie koffie en geleuf het of neit, hij huilp waarachtig hier en daor met het hoesholden. Dat helpen wör in de loop van de volgende weken bemuien. Hij bemuide zich met het stofzoegschema. Volgens Hinderk mus der nao het middageten stofzoegd worden: Je knoeien altied wel wat bai t broodeten. En het moment van raomenwassen was volgens hum slim aofhankelijk van de windrichting en de regen die der veurspeld wör. Zo haar e ok nog theorieën over bloumen waotergeven en was ophangen. Geertie luit het allemaol maor wat begaon. Oeteindelijk scheelde het heur ok een barg waark.
Aans wör het toen Hinderk zich met de veurraodkast en de bosschoppen gung bemuien. Haar e tot dan tou de winkelfolders allein mor in de handen had om ze in de papierbak te gooien, meer en meer gung hij ze oetvlooien om mor zo veurdeilig meugelijk inkopen te doun. Hij haar de veurraodkast ok per plaank indeild op de verschillende winkels. Een plaank veur de Aldi, C1000, Lidl en AH. An de binnenkaant van de deur stun precies te lezen wat waor kocht worden mus. Ok de aantallen per artikel huil ‘e precies bai. Dat was veur as der ein van de artikelen in de anbeiding was. Zo koj precies zein houveul je dan veurdeilig kon inslaogen, zunder daj over de oeterste gebruuksdaotum kwamen. Op ooghoogte haar ‘e overigens een plaankie maokt veur artikelen waorvan de holdbaorhaaidsdaotum zowat verstreken was.
Hinderk wol niks weiten van de protesten die Geertie aal vaoker heuren luit. Zeker in een crisistied, moej op de centen passen.
Het wör met de dag slimmer. Geertie, de kachel kan best wat eerder nor beneden, zee e op een aovend en dee zien vest an. Geertie haar op den duur an een trui èn een vest niet genog. Ze kroop mor wat eerder op berre in de hoop dat het seksleven dan misschien wat naaie impuls kriegen zul. Dat was ok niet het geval….
Ze het het een maond of zes an zein. Ze het nog een poging daon om hum in de tuun an het waark te kriegen, mor Hinderk von daj de natuur zien gang moeten laoten gaon. Toen Geertie zee dat het, in verband met de crisis, neit zun slecht idee was om zölf het schilderwaark boetenom te doun, von Hinderk dat dat nog wel een jaor zo zitten kun.
Waor gaaist hin, zee Hinderk, toen Geertie op een aovend met de jas an de kaomer binnenstapte. “Buurvrouw zee, dat ik nor een pikcursus moet, zee ze. Hinderk vuil hom het vaalse gebit zowat oet de mond: Een pikcursus?!  Jao”, vervolgde Geertie,  PIC met een  C , das veur mensken die de PIZ cursus mist hebben. PIC staait veur Pensioen is Crisis”.
Aanderdaogs het Hinderk humzölf een naaie fiets kocht. “ Aal in hoes zitten is niks veur mai wicht, ik moet wat meer nor boeten… Geertie het toen alvaast een paor naaie kwasten haold.