02-02-2010 - Lammert Douwes: De facelift met gevolgen

Vrouger was Hillegie een mooie meid. Dat ze mooi was wus ze zölf maor al te best.
Op schoul waren er heul wat jonges die in stilte wel eins van heur dreumden.
Hillegie trouwde met Haarm toen ze krap an twintig was. Haarm kwam oet Hieken waor zien olders een keuterboerderijgie hadden. Hij was een paor jaor older, maor verder was ’t een goeie, maor een wat simpele kerel. Hillegie en Haarm kregen drei kinder. Twei wichter en ein jong.

Nao dreimaol in de kraom was het beste bij Hillegie der ok wat aof en was ze vanzölf ok niet zo slaank meer als vrouger. Daor zat ze al een paor jaor met in de maog. Op ’n dag zee ze tegen Haarm. Ik laot er wat an doun. Ik laot mij in de stad eerst es mien rimpels weghaolen. Dat is maor een poep en scheet heb ik in de kraant lezen en ok nog wel te betaolen.
De chirurg was heul tevreden en Haarm ok. Gien rimpels meer en niks gien vollen.
Toen adviseerde de chirurg Hillegie om ok wat an heur börsten te laoten doun. Die hingen volgens hum veul te leeg. Toen ze optrokken waren, leken ze wat an de kleine kaant. Wat silliconen d’r in en het leek weer heul wat. Haarm stun in vuur en vlam en toen ze ’s aovonds an ’t vrijen waren zee hij tegen Hillegie. Aj’t heulemaol in order wilt hebben dan moejj ok de billen en de boek wat ontvetten laoten.
Hillegie nog ein keer naor stad. Ze zat daornao zo strak in heur vel dat ze op elk feessie waor ze kwamen bij alle kerels in tel was.
Dat vun Haarm neit zo mooi en op straot ruipen de kwaojongs hum wel eins nao:
“Gaoj lekker Haarm”.
Haarm steurde zich daoran, kocht zich een proek en hij ging wandeln en trimmen. Hij gung naor het fitnesscentrum en volgde een streng dieet, totdat hij op ’n dag zomaor in de sauna overleed.
Daor stun Hillegie dan op ’t kerkhof, mooi te wezen an Haarm zien graf.
Ze zee bij zichzölf: “Nou Haarm mij niet meer zein kan, is veur mij de aordigheid d’r ok aof”.
Vanaof die tied lig Hillegie niet meer wakker van een rimpelie hier of een vetkwab daor. Ze is d’r van overtuugd dat een plastisch chirurg joen leven ok niet rekken kan.
Hillegie adviseert dan ok alle wichter en vrouwlu die ze kent om hun lief en onderkin te koestern.
“Schoonhaid komp van binnenoet”, zeg Hillegie en vertel dat maor rustig an joen man, want aanders kommen d’r ongelukken van.