23-06-2009 - deur Harm Soegies, taolschulte van Het Hoes van de Taol

Elf schrievers oet Noordenveld trappeln van ongeduld.

Veurig jaor meert is Het Hoes van de Taol in Beilen lös gaon. Het is Het Huus van de Taol, maor ik zeg Het Hoes van de Taol, omdat wij dat in Noordenveld zo zeggen.

Jan Germs en Abel Darwinkel timmern flink aan de weg, elke gemeeinte hef zien taolschulte en bijna elk dörp zien keurnoot. Zo lig der een deken van meènsken met hart veur heur streektaol over Drenthe en dus ok over Noordenveld.
Heuil veul teneeilvereinigingen bij oons speulen in de streektaol en denk ok maor aan het openluchtspel in Rowol.In Peize hebben we D.A.P. (Dreèntse Activiteiten Peize ) in Het Dagblad van het Noorden wordt elke week deur Abel een stukkie in de streektaol schreven,maor ok in oonze streekblaoden en vereinigingsbladties kunnen we al heuil wat rubriekies in oons Dreènts lezen. En al wordt der deur kinder neeit zo veul Dreènts meer praot,, de belangstelling veur oonze streektaol is in tieden neeit zo groot weèst. Het is dan ok gooud, om dit stukkie eigen cultuurgooud te bewaoren en om der wies op te wezen. En as ze zölfs de leeidties van oonze streektaolmuzikanten in de Randstad metzingen, waor zullen wij oons dan veur schaomen!
Dat vindt ok de redaksie van De Krant en daorom komp vanaof noou om de virtien daogen het rubriekie Moi Noordenveld in dit streekblad. De stukkies worden schreven deur elf Noordenvelders en dat bennen :
• Rits Aalders oet Nei - Roon,
• Albert Boelen oet Foxwol,
• Anne Doornbos oet Eein,
• Lammert Douwes oet de Neeitap,
• Jans Geerts en Siek Runsink oet Roon,
• Lammert Keizer oet Rowol,
• Martin Koster en Lammie Venekamp oet Lievern,
• Tea Nijnuis oet Peize en
• Harm Soegies oet Westervelde.
Elf Noordenvelders met totaol verschillende achtergronden.
De strekking van heur bijdraogen in De Krant zullen dan ok wel totaol verschillend wezen.
Ik wens ze veul schriefplezeer en de lezers veul leesplezeer.
Tot over virtien daogen bij Moi Noordenveld.