22-11-2011 - Tea Nijnuis

Tegenwoordig is men veural bezig met zichzölf. Men wil tegenwoordig zo laang mögelijk gezond blieven en belangrieker nog, men wil d’r veural jong oet blieven zein. Een gezond en mooi lichaom is veur veul mensken huil belangriek. Toch bestaon d’r ok verschillen. De ein is veural bezig met een gezond lichaom terwijl de aander d’r alles an döt om d’r veural mooi oet te zein. Zo kan het gebeuren daj onderweg verschaaiden mensken tegenkommen die an ’t sporten bennen. Aole koppen, want het is vaok de aoldere generaotie die het fanatiekst bennen, op rolscheuvels, hardloopschounen of racefietsen. En aj mor flink hardlopen of aans trainen dan blief je wel lekker fit. Dan blief je wel jong van binnen mor niet van boeten. An de boetenkaant kommen de rimpels gewoon.

D’r bennen ok mensken die d’r niet zoveul waark van hebben willen, die willen zich niet in het zweit jaogen, en die gaon nor de oetstukdokter. Die bennen an de boetenkaant weer jong mor van binnen bennen ze old want ze hebben niet het oethollingsvermogen van ein die jong is.

Het volgende gedicht gaait over die schoonhaaid. Het is mor net hou of je bennen…..

Schoonhaaid
Sjieke jurken en stinkend dure japonnen
Sieraoden van wel enkele tonnen
Dure parfums en gekleurde bossen haor
Schounen van wel doezend euro per paor.

Kunstwimpers en gekleurde lenzen
voldoun precies an onze wensen
Een crême veur een mooie gladde hoed
Zo zein wie d’r aal mooier oet.

Borsten en lippen van siliconen
’t Vel wordt oprekt vanaof de tonen
Plastisch chirurg mokt buuk en billen weer strak
en bai de ogen mokt e ’t ok weer vlak

Zo vuilen wie ons weer mooi en prachtig
mor ’t is allemaol nep, waarachtig
Want an ‘t karakter is niet sneden
Dat blif zo as ’t was in ’t verleden.

Schoonhaaid kent helaas nog gien kleur
en schoonhaaid hét ok nog gien geur
An de boetenkaant kuj van alles verzinnen
mor echte schoonhaaid zit toch van binnen.