29-11-2011 - Lammert Keizer - Dag Meester...

Soms lees ik wel es wat in de kraant en dan denk ik: “ Ben ik nou gek.... ?!”
Een etterbakkie van een jaor of dartien maokt ruzie in de klas. De vechtersbaozen worden oetmekaor haold en de anstichter moet het lokaol oet. Hij verdomt het, ok nao meerdere maolen vraogen. Een aandere leraor wordt der baihaold en die pakt hum bai kop en kont en zet hum oet de klas. Goud oplöst zu´k zo zeggen. Maor niks is minder waor. Het etterbakkie döt thoes zien beklag en zien vaoder gaait drekt op hoge poten nor schoul. Wat denkt die onderwiezer wel! Gienein komp an mien jonkie, plietsie der baihaold en even laoter zit de leraor in de bak ........

Ik zat in Rowol bai meester Sprenger in de vaaierde klas. En wat mai nog nooit eerder overkommen was.... ik mus naoblieven, omdat ik tiedens het zingen tot drei keer tou te haard deur de klas raosd haar….ja, ja! Ik weit zölfs nog welk versie wai zongen... het gung over Jan, Piet, Joris en Korneel.... Wat haar ik een mazzel dat 's middags de bibliobus kwam en dat ik de bouken dizze keer al bai mai haar. Aans waren mien pap en mam der ok achter kommen en haar ik van heur ok nog es de wind van veuren kregen.
Ik was een jaor of twaalf en net van de legere schoul aof. Fietsend vanaof de Ulo in Roon kwam ik ter hoogte van Derk Bathoorn meester van der Velde tegen. Groot en stoer vuilde ik mai en zee een beetie onverschillig: "Moi!". Nou dat heb ik weiten, aanderdaogs wör ik anhollen en kreeg in niet mis te verstaone bewoording te heuren dat dat niet de bedouling was. Ok al zat ik niet meer bai hum in de klas, het was nog altied: "Dag meester". In de maonden daornao hoopte ik mor, dat ik hum niet weer tegenkwam.
In diezöfde maond reed ik deur het Haorveen. Ik vuilde mai groot en stoer, dus ik fietste met lösse handen. Zo mor ineins stun der een plietsie veur mien neus. "Zo jongkerel”, zee e, “za'k joen stuur mor metnimmen, want je hebben hum toch neit neudig". Daornao heb ik wekenlaang altied met baaide haanden an't stuur reden, met in de kop dat der van achter elk bossie zo mor weer zu'n veldwachter teveurschien kommen kon.
Ik wil niet zeggen dat het vandaog de dag weer allemaol net zo gaon moet, mor as ik de woordvoerder van de plietsie heur zeggen dat ze de leraor in de bak stopt hebben om hum te bescharmen tegen de agressieve vaoder, zakt mai de boksem van de kont. Der bennen toch zeker ok tieden west dat zukswat net aansom oplöst wör..? Olders kommen bai het minste of geringste in de beinen as heur prins of prinses wat andaon wordt. Zich aofvraogen of die der zölf ok wat met te maoken het, komp vaok niet in heur op. Onze minister van onderwies kwam in dit geval ok niet wieder dan dat het verontrustend is. Ze vraogt zich wel regelmaotig aof, woarom der tegenwoordig zo weinig leifhebberaai is om veur de klas te gaon staon. Ik denk dat ik het wel weit waorom dat is....... as het zo deur gaait is het straks veurgoud: “ Dag meester!”.